نصیر آباد کے علاقے چھتر میں بی ایل اے (بلوچ لبریشن آرمی) کے مسلح دہشت گردوں نے 220 کے وی کی مرکزی بجلی کی لائن کے ٹاور کو دھماکہ خیز مواد کے ذریعے تباہ کر دیا، جس کے نتیجے میں کئی ملحقہ علاقوں میں بجلی کی فراہمی مکمل طور پر منقطع ہو گئی ہے۔
اطلاعات کے مطابق چھتر میں پیش آنے والے اس واقعہ میں شدت پسندوں نے بجلی کے ٹاور میں دھماکہ خیز مواد نصب کر رکھا تھا۔ شدید دھماکے کے باعث ٹاور بری طرح متاثر ہو کر ناکارہ ہو گیا، جس کی وجہ سے نصیر آباد اور اس کے گرد و نواح کے اضلاع میں تاریکی چھا گئی اور بجلی کا نظام درہم برہم ہو گیا۔
واقعے کی اطلاع ملتے ہی سیکورٹی فورسز نے علاقے کو گھیرے میں لے کر تحقیقات اور سرچ آپریشن کا آغاز کر دیا ہے، جبکہ کیسکو حکام کی جانب سے متاثرہ ٹاور کی مرمت اور بجلی کی بحالی کے لیے ٹیمیں روانہ کر دی گئی ہیں۔
