ویب ڈیسک: بلوچستان کے ضلع مکران میں سیکورٹی فورسز نے ڈپٹی کمشنر تمپ کے قافلے پر دہشت گردوں کا حملہ ناکام بناتے ہوئے ان کے اغوا کا مذموم منصوبہ خاک میں ملا دیا ہے.
سیکورٹی ذرائع کے مطابق فتنہ الہندستان (کالعدم بی ایل اے) کے دہشت گردوں نے ڈپٹی کمشنر کی گاڑی کو نشانہ بناتے ہوئے ان کے پروٹیکشن اسکواڈ کے اہلکاروں کو اغوا کرنے کی کوشش کی. تاہم، سیکورٹی فورسز نے انتہائی پھرتی اور پیشہ ورانہ مہارت کا مظاہرہ کرتے ہوئے فوری جوابی کارروائی کی.
فورسز کے شدید دباؤ پر حملہ آور فرار ہونے پر مجبور ہو گئے اور فرار ہوتے وقت اپنی گاڑی اور اسلحہ وہیں چھوڑ گئے. اس کامیاب اور بروقت کارروائی کے نتیجے میں ڈپٹی کمشنر کا تمام پروٹیکشن اسکواڈ محفوظ رہا اور کسی قسم کا جانی نقصان نہیں ہوا۔ ذرائع کا کہنا ہے کہ جوابی کارروائی میں کئی دہشت گرد زخمی بھی ہوئے ہیں.
مکران کے حساس علاقوں میں سرکاری حکام اور پبلک انسٹی ٹیوشنز کو تحفظ فراہم کرنے کے لیے سیکورٹی فورسز کی انٹیلی جنس بیسڈ کارروائیاں اور آپریشنز مسلسل جاری ہیں، تاکہ دشمن عناصر کے ناپاک عزائم کو مستقل طور پر روکا جا سکے.
