11-OCT-2026
خبرکدا ویب ڈیکس: بلوچستان کے علاقے تمپ کے کوہستانی علاقے میں سیکیورٹی فورسز نے آپریشن رد الفتنہ III کے تحت انٹیلی جنس بیسڈ آپریشن (IBO) کے دوران ایک دہشت گرد کو ہلاک اور کئی کو زخمی کر دیا ہے۔
موصولہ تفصیلات کے مطابق، سیکیورٹی فورسز نے فتنتہ الہندستان (FAH) سے وابستہ دہشت گردوں کی موجودگی کی خفیہ اطلاعات پر جدید ٹیکنالوجی کا استعمال کرتے ہوئے کارروائی کی۔ فائرنگ کے تبادلے کے نتیجے میں ایک دہشت گرد ہلاک جبکہ متعدد زخمی ہو گئے۔
مطلوب دہشت گرد سیف جلال ہلاک
آپریشن کے دوران ہلاک ہونے والے دہشت گرد کی شناخت سیف جلال کے نام سے ہوئی ہے، جو فتنتہ الہندستان کا کارندہ تھا۔ سیکیورٹی ذرائع کے مطابق، وہ علاقے میں اغوا برائے تاوان، بھتہ خوری، مقامی شہریوں کی ٹارگٹ کلنگ اور تاجروں اور کنٹریکٹرز کی گاڑیوں کو نذر آتش کرنے کی وارداتوں میں ملوث تھا۔
اسلحہ، مواصلاتی آلات اور ممنوعہ تنظیم کے جھنڈے برآمد
کلیئرنس آپریشن کے دوران سیکیورٹی فورسز نے دہشت گردوں کے زیر استعمال اسلحہ اور دیگر سامان قبضے میں لے لیا، جن میں درج ذیل اشیاء شامل ہیں:
- اسلحہ و مواصلات: ایک سب مشین گن (SMG) مع تین میگزین اور ایک موٹرولا کمیونیکیشن سیٹ۔
- الیکٹرانکس اور سواری: ایک اسمارٹ فون، دو سادے موبائل فون، دو پاور بینک اور دو موٹرسائیکلیں ۔
- پرچم: کالعدم تنظیم بلوچستان لبریشن آرمی (BLA) کے تین جھنڈے ۔
برآمد ہونے والا اسلحہ اور سامان خطے میں معصوم شہریوں اور املاک کو نشانہ بنانے کے لیے استعمال کیا جانا تھا۔ فرار ہونے والے زخمی دہشت گردوں کی گرفتاری کے لیے علاقے میں سرچ آپریشن تاحال جاری ہے۔
