ضلع خیبر کے علاقے شن کمر میں سیکیورٹی فورسز کا انٹیلی جنس بیسڈ آپریشن، ایک دہشت گرد ہلاک
خیبر، 4 اگست: خیبرپختونخوا کے ضلع خیبر کی تحصیل باڑہ کے علاقے شن کمر میں سیکیورٹی فورسز نے خفیہ اطلاعات کی بنیاد پر ایک انٹیلی جنس بیسڈ آپریشن کیا۔
سیکیورٹی ذرائع کے مطابق آپریشن کے دوران دہشت گردوں اور سیکیورٹی فورسز کے درمیان شدید فائرنگ کا تبادلہ ہوا، جس کے نتیجے میں ایک دہشت گرد ہلاک جبکہ متعدد دیگر زخمی ہو گئے۔
ذرائع کا کہنا ہے کہ سیکیورٹی فورسز نے علاقے کا محاصرہ کر لیا ہے اور فرار ہونے والے دہشت گردوں کی تلاش کے لیے سرچ اور کلیئرنس آپریشن جاری ہے۔
حکام کے مطابق علاقے میں امن و امان کی صورتحال برقرار رکھنے کے لیے سیکیورٹی اقدامات مزید سخت کر دیے گئے ہیں، جبکہ مقامی آبادی کے تحفظ کو یقینی بنانے کے لیے بھی ضروری اقدامات کیے جا رہے ہیں۔
سیکیورٹی اداروں کا کہنا ہے کہ ملک سے دہشت گردی کے مکمل خاتمے تک ایسی کارروائیاں جاری رہیں گی۔
