ویب ڈیسک: محکمہ انسداد دہشتگردی (سی ٹی ڈی) نے وفاقی حساس ادارے کے ساتھ مشترکہ کارروائی کرتے ہوئے کالعدم تنظیم سے وابستہ ٹاپ 10 انتہائی مطلوب ٹارگٹ کلر کو گرفتار کر لیا ہے۔
سی حکام کے مطابق گرفتار ملزم کی شناخت سید محمد عسکری عابدی کے نام سے ہوئی ہے، جو سی ٹی ڈی کی ریڈ بک ایڈیشن 10 میں انتہائی مطلوب دہشتگردوں کی فہرست میں شامل تھا اور طویل عرصے سے روپوش تھا۔ ملزم کراچی میں اپنی کالعدم تنظیم کے نیٹ ورک کو دوبارہ منظم کرنے کی کوشش کر رہا تھا۔
برآمدگی اور مقدمات: آپریشن کے دوران ملزم کے قبضے سے کلاشنکوف اور ہینڈ گرنیڈ برآمد ہوا ہے۔ سی ٹی ڈی کے مطابق ملزم شہر کے مختلف تھانوں میں ٹارگٹ کلنگ اور دہشتگردی کے سنگین مقدمات میں مطلوب تھا، جبکہ ابتدائی تفتیش میں اس نے ریکی کے بعد ٹارگٹ کو نشانہ بنانے کے متعدد واقعات کا اعتراف بھی کیا ہے۔
سیکیورٹی صورتحال اور دیگر کارروائیاں: حکام کا کہنا ہے کہ ملک بھر میں انٹیلی جنس بیسڈ آپریشنز کا دائرہ کار وسیع کر دیا گیا ہے تاکہ دہشتگرد نیٹ ورکس کو ان کے سہولت کاروں سمیت مکمل طور پر ختم کیا جا سکے۔ واضح رہے کہ رواں ماہ کے آغاز میں بھی کراچی سی ٹی ڈی نے ڈیفنس فیز ٹو میں یومِ آزادی کے اسٹال پر فائرنگ اور ایک شہری کے قتل میں ملوث کالعدم ایس آر اے (Sindhudesh Revolutionary Army) کے تین کارندوں کو گرفتار کیا تھا، جبکہ بلوچستان میں بھی بی ایل اے کے خلاف کارروائیاں جاری ہیں۔
