نیوزڈیسک: ڈپٹی کمشنر حب کیپٹن (ر) جمعداد خان مندوخیل کی ہدایات پر اسسٹنٹ کمشنر حب مہیم خان گچکی کی سربراہی میں شہر میں ناجائز تجاوزات کے خلاف کارروائی کی گئی۔
کارروائی کے دوران تحصیلدار حب محبوب چنال، ڈی ایس پی ٹریفک گل حسن پندرانی اور میونسپل کارپوریشن حب کا عملہ بھی موجود تھا۔
انتظامیہ کی ٹیم نے شہر کی مختلف شاہراہوں اور اہم مقامات کا معائنہ کیا، جہاں سڑکوں اور فٹ پاتھوں پر قائم ریڑھیوں، کیبنز اور ٹھیلوں کے باعث ٹریفک کی روانی اور شہریوں کی آمدورفت متاثر ہو رہی تھی۔
انتظامیہ نے موقع پر کارروائی کرتے ہوئے سڑکوں اور فٹ پاتھوں سے تمام رکاوٹیں ہٹوا دیں، جبکہ متعدد ریڑھیاں، کیبن اور ٹھیلے تحویل میں لے لیے گئے۔
اس موقع پر اسسٹنٹ کمشنر حب مہیم خان گچکی نے کہا کہ شہریوں کو آمدورفت میں سہولت فراہم کرنا اور شہر میں ٹریفک کی روانی برقرار رکھنا انتظامیہ کی ترجیحات میں شامل ہے۔
انہوں نے واضح کیا کہ شاہراہوں اور فٹ پاتھوں کو تجاوزات سے پاک رکھنے کے لیے کارروائیوں کا سلسلہ جاری رہے گا اور شہریوں کو بھی تجاوزات قائم کرنے سے گریز کرنا ہوگا۔
