خبرکداویب ڈیکس: پاکستان سکیورٹی فورسز نے بلوچستان کے اضلاع پنجگور اور چاغی میں خفیہ معلومات کی بنیاد پر کیے گئے الگ الگ آپریشنز کے دوران 11 دہشت گردوں کو جہنم واصل کر دیا۔ کارروائیوں کے دوران بھاری مقدار میں اسلحہ اور گولہ بارود بھی برآمد کر لیا گیا ہے۔
سکیورٹی ذرائع کے مطابق پنجگور کے علاقے گوارگو میں کیے گئے آپریشن کے دوران 5 دہشت گرد مارے گئے، جن کے قبضے سے اسلحہ اور گولہ بارود کا بڑا ذخیرہ ملا ہے۔ اسی طرح چاغی کے علاقوں امین آباد اور سیاہ چنگ میں سکیورٹی فورسز نے مزید 6 دہشت گردوں کو ہلاک کر دیا۔
یہ کارروائیاں بلوچستان میں جاری انسدادِ دہشت گردی مہم “رَدُّ الفتن 3” اور انٹیلی جنس بیسڈ آپریشنز کا حصہ ہیں، جن کا مقصد دہشت گردوں کے نیٹ ورکس اور ان کے سہولت کاروں کا خاتمہ کرنا ہے۔
واضح رہے کہ اس سے قبل 18 ستمبر کو پنجگور اور کچھی میں کیے گئے آپریشنز کے دوران بھی 7 دہشت گرد ہلاک کیے گئے تھے، جبکہ 17 ستمبر کو آوران کے علاقے بدرنگ میں بھی سکیورٹی فورسز نے 3 دہشت گردوں کو ٹھکانے لگایا تھا۔ بلوچستان بھر میں دہشت گردوں اور ان کے مذموم عزائم کو ناکام بنانے کے لیے سکیورٹی فورسز کے آپریشنز تاحال بھرپور انداز میں جاری ہیں۔
