2-NOV-2026
خبرکدا)ویب ڈیکس(: پنچگور کے علاقے پروم سے تعلق رکھنے والے ہلاک دہشت گرد شکیل احمد کے والد اور بھائی نے ایک پرہجوم اور باہمت پریس کانفرنس میں دہشت گردی، پرتشدد کارروائیوں اور ریاست سے غداری کے راستے کی شدید الفاظ میں مذمت کرتے ہوئے پاکستان سے اپنی مکمل وفاداری کا اعادہ کیا ہے۔
ورغلانے، گمراہی اور غداری کے راستے کی شدید مذمت
پریس کانفرنس کے دوران ہلاک دہشت گرد کے والد عبدالمجید اور بھائی محمد حیات نے شکیل احمد کے غلط اور تخریبی انتخاب پر گہرے دکھ، افسوس اور ندامت کا اظہار کیا۔ انہوں نے بتایا کہ شکیل پانچ سال قبل بھارتی سرپرستی میں کام کرنے والی تنظیم ‘فتنۃ الہندوستان’ (بی ایل اے) کی زہریلی پروپیگنڈا مہم سے متاثر ہو کر گمراہ ہوا اور گھر چھوڑ کر چلا گیا۔
خاندانی ذرائع کا کہنا تھا کہ شکیل احمد نے ایک بار سرینڈر کر کے قومی دھارے میں شامل ہونے کی کوشش کی تھی، لیکن وہ افسوسناک طور پر دوبارہ ان وطن دشمن عناصر کے فریب میں آ گیا۔ حال ہی میں گوادر میں سیکیورٹی فورسز کی ایک کارروائی کے دوران وہ اپنے انجام کو پہنچا۔
بلوچ والدین کے نام اپیل: بچوں کو گمراہی سے بچائیں
ہلاک دہشت گرد کے والد اور بھائی نے تمام بلوچ والدین پر زور دیا کہ وہ اپنے بچوں کی نقل و حرکت پر کڑی نظر رکھیں اور انہیں دہشت گرد تنظیموں کے مذموم مقاصد کا شکار ہونے سے بچائیں۔ انہوں نے کہا کہ فتنۃ الہندوستان اور دیگر کالعدم تنظیمیں غیر ملکی ایجنڈے پر عمل پیرا ہیں، جو جھوٹے دلاسوں اور زہریلی مہمات کے ذریعے معصوم بچوں اور ان کے خاندانوں کی زندگیاں برباد کر رہی ہیں۔ انہوں نے والدین سے اپنے بچوں کی اعلیٰ تعلیم اور مثبت تربيت پر توجہ دینے کی اپیل کی۔
دہشت گردی کے خلاف بڑھتا ہوا عوامی شعور
دہشت گردی کے راستے پر بھٹک جانے والوں کے اہلخانہ کی جانب سے اس قسم کے اعلانیہ بیانات بلوچستان میں سیکیورٹی فورسز پر اعتماد، امن و امان کی خواہش اور فتنۃ الہندوستان جیسے عناصر کی مکمل تنہائی اور ناکامی کا واضح ثبوت ہیں۔ عوامی حلقوں نے خاندان کے اس حوصلہ مندانہ اقدام کو سراہتے ہوئے خطے میں امن اور ترقی کے لیے اہم پیشرفت قرار دیا ہے۔
