ملک سے دہشت گردی کے مکمل خاتمے اور غیر ملکی سرپرستی میں چلنے والے نیٹ ورکس کو تباہ کرنے کے لیے سیکیورٹی فورسز اور پولیس نے انٹیلی جنس معلومات پر مبنی مشترکہ کارروائیاں کرتے ہوئے 49 دہشت گردوں کو جہنم واصل کر دیا۔ یہ کامیابیاں وفاقی ایپیکس کمیٹی کے منظور شدہ قومی ایکشن پلان کے وژن “عزمِ استحکام” کے تحت حاصل کی گئیں۔
خیبر پختونخوا: ‘فتنہ الخوارج’ کے 12 دہشت گرد ہلاک
خیبر پختونخوا کے اضلاع بنوں، شمالی وزیرستان، اورکزئی اور خیبر میں ہندوستانی سرپرستی میں کام کرنے والے “فتنہ الخوارج” کے خلاف اعلیٰ سطح کے انٹیلی جنس بیسڈ آپریشنز کیے گئے۔ ان کارروائیوں کے دوران 12 خوارج ہلاک ہوئے جبکہ بھاری مقدار میں دھماکا خیز مواد، آئی ای ڈی (IED) ریموٹ کنٹرول، جدید اسلحہ، گولا بارود اور موٹر سائیکلیں برآمد کر کے تباہ کر دی گئیں۔
بلوچستان: ‘فتنہ الہندوستان’ کے 37 شرپسند واصلِ جہنم
بلوچستان کے اضلاع مستونگ، مچھ، خضدار اور پنجگور میں سیکیورٹی فورسز نے 10 مختلف انٹیلی جنس بیسڈ آپریشنز کے دوران “فتنہ الہندوستان” کے 37 دہشت گردوں کو ہلاک کیا۔ کارروائیوں کے دوران اسلحہ، دھماکا خیز مواد سے بھرے ڈرم اور ریموٹ ڈیٹونیشن آلات کی بڑی مقدار بھی تحویل میں لے کر تلف کر دی گئی۔
عزمِ استحکام: کارروائیاں بلا تعطل جاری رہیں گی
سیکیورٹی فورسز اور قانون نافذ کرنے والے ادارے سرحدوں کے تحفظ اور ملک میں امن و امان قائم رکھنے کے لیے مکمل طور پر متحد اور پرعزم ہیں۔ علاقے کو دیگر بھارتی پراکسیز اور شرپسندوں سے پاک کرنے کے لیے کلیئرنس اور سنینیٹائزیشن آپریشنز جاری ہیں تاکہ بیرونی فنڈنگ پر چلنے والی دہشت گردی کا یکسر خاتمہ کیا جا سکے۔
