صدر مملکت آصف علی زرداری اور وزیراعظم شہباز شریف نے جمعے کے روز کوئٹہ کے علاقے سونگی میں کوئلے کی کان میں ہونے والے افسوسناک دھماکے پر گہرے دکھ اور افسوس کا اظہار کیا، جہاں حادثے کے وقت 42 کان کن کان کے اندر موجود تھے۔
صدر مملکت اور وزیراعظم نے اپنے الگ الگ بیانات میں متعلقہ حکام کو ہدایت کی کہ امدادی کارروائیاں ہنگامی بنیادوں پر جاری رکھی جائیں، تمام متاثرہ مزدوروں کو بحفاظت نکالنے کے لیے ہر ممکن اقدامات کیے جائیں اور زخمیوں کو بہترین طبی سہولیات فراہم کی جائیں۔
دونوں رہنماؤں نے جاں بحق ہونے والے افراد کے اہلِ خانہ سے دلی تعزیت کا اظہار کیا، مرحومین کے درجات کی بلندی کے لیے دعا کی اور متاثرہ خاندانوں کے ساتھ مکمل یکجہتی کا اظہار کیا۔ انہوں نے لواحقین کے لیے صبرِ جمیل اور حوصلے کی بھی دعا کی۔
صدر مملکت اور وزیراعظم نے اس سانحے کے تناظر میں کوئلہ کانوں میں حفاظتی اقدامات کو مزید مؤثر بنانے کی ضرورت پر بھی زور دیا۔
