خبر کدا ویب ڈیسک: کالعدم دہشتگرد تنظیم بلوچ ریپبلکن گارڈز (BRG) کی جانب سے کچھی کے علاقوں میں نام نہاد ناکہ بندیوں، گاڑیوں کی تلاشی اور گشت کے جھوٹے دعوے ایک بار پھر اس کے پروپیگنڈا نیٹ ورک کو بے نقاب کر چکے ہیں۔ سکیورٹی فورسز کی موثر اور مسلسل کارروائیوں کے نتیجے میں زمین تنگ ہونے پر یہ گروہ اب اوچھے ہتھکنڈوں اور فرضی اسٹنٹ کے ذریعے اپنی موجودگی کا جھوتھا تاثر دینے کی ناکام کوشش کر رہا ہے۔
حکام کے مطابق، فتنہ الہند سے جڑی اس کالعدم تنظیم کی جانب سے سوشل میڈیا پر جاری کردہ یہ فرضی “چیک پوسٹیں” اس کے سوا کچھ نہیں کہ شکست خوردہ دہشتگرد مایوسی کے عالم میں سستی شہرت اور نفسیاتی دباؤ کے لیے ڈرامے رچا رہے ہیں۔ زمینی حقیقت یہ ہے کہ اس خونی گروہ کا کسی بھی علاقے پر کوئی زمینی وجود یا کنٹرول باقی نہیں رہا۔
بی آر جی کا پورا پروپیگنڈا نظام صرف اور صرف فریب پر کھڑا ہے۔ یہ عناصر بجلی کے ٹاورز کو اڑا کر، عوامی املاک کو نقصان پہنچا کر اور بنیادی خدمات معطل کر کے بلوچستان کے عام شہریوں کی روزی روٹی کو نشانہ بنا رہے ہیں۔ ان کے اس طرح کے شیطانی ہتھکنڈے صریحاً ان کے عوام دشمن ایجنڈے کو ظاہر کرتے ہیں، جہاں خوف اور جبر کے ذریعے اسی آبادی کو ڈرایا جاتا ہے جس کے نام پر یہ سیاست چمکانے کی کوشش کرتے ہیں۔
جعلی ناکوں اور سڑکوں پر چیکنگ کے یہ من گھڑت دعوے خوف پھیلانے، شہریوں کی نقل و حرکت میں خلل ڈالنے اور وہاں دہشتگردوں کی فرضی اتھارٹی ثابت کرنے کی ایک سوچی سمجھھی سازش ہیں۔ دوسری طرف، قانون نافذ کرنے والے ادارے منظم کارروائیوں کے ذریعے ان عناصر کو چھپنے کی کوئی جگہ نہیں دے رہے، ان کے تمام نیٹ ورک توڑے جا رہے ہیں اور عوام کی بلاخوف و خطر آمدورفت کو مکمل طور پر یقینی بنایا جا رہا ہے۔
بلوچستان کے باشعور عوام دہشتگردوں کی ان غنڈہ گردی اور دھمکیوں کو یکسر مسترد کرتے ہیں۔ صوبے کے باسی امن، ترقی، استحکام اور قانون کی حکمرانی کے ساتھ کھڑے ہیں اور دہشتگردی کے انوکھے ہتھکنڈے اب کسی صورت کامیاب نہیں ہو سکتے۔
