2-NOV-2026

خبرکدا)ویب ڈیکس(: گرین پاکستان انیشیٹو (Green Pakistan Initiative) کے تحت بلوچستان کی دشت ویلی میں زرعی انقلاب کی نئی لہر نے جنم لیا ہے، جہاں سالہا سال سے بنجر پڑی زمینیں اب سرسبز اور شاداب کھیتوں میں تبدیل ہو رہی ہیں۔ اس منصوبے کا مقصد صوبے میں غذائی تحفظ اور معاشی خوشحالی کے نئے دور کا آغاز کرنا ہے۔

3300 ایکڑ اراضی کی ہمواری اور جدید آبپاشی

منصوبے کے پہلے مرحلے کے دوران دشت ویلی کی 3 ہزار 300 ایکڑ اراضی کو کامیابی سے ہموار کر دیا گیا ہے تاکہ فصلوں کے لیے پانی کی یکساں فراہمی اور مؤثر استعمال کو یقینی بنایا جا سکے۔ اس کے ساتھ ساتھ مقامی کسانوں کو جدید زرعی تکنیکوں اور جدید طریقۂ کاشت سے روشناس کرانے کے لیے خصوصی تربیتی اقدامات کیے جا رہے ہیں، جس سے فی ایکڑ پیداواری صلاحیت میں نمایاں اضافہ ممکن ہوگا۔

شمسی توانائی سے طاقتور اور ماحول دوست آبپاشی

منصوبے کی اہم پیشرفت علاقے میں سولر (شمسی) ٹیوب ویلز کی بڑے پیمانے پر تنصیب ہے۔ سولر انرجی کے استعمال سے مقامی کسانوں کو نہ صرف سستی، صاف اور ماحول دوست آبپاشی کی سہولت میسر آئی ہے بلکہ بجلی اور ڈیزل کے بھاری اخراجات میں نمایاں کمی کے ساتھ ساتھ پانی کی کمی کے چیلنج پر قابو پانے میں بھی بڑی مدد ملی ہے۔

زرعی ترقی اور خوشحالی کے نئے امکانا ت

دشت ویلی کے کھیتوں میں لوٹتی ہوئی ہریالی اور فصلوں کی شادابی اس بات کا ثبوت ہے کہ گرین پاکستان انیشیٹو بلوچستان کے کسانوں کو خودکفیل بنانے اور خطے کی معاشی و سماجی تقدیر بدلنے میں کلیدی کردار ادا کر رہا ہے۔ مقامی کسانوں اور عوام نے اس اقدام کو علاقے کی خوشحالی کے لیے ایک اہم پیشرفت قرار دیا ہے۔