خبر کدا ویب ڈیکس: کوہاٹ میں ہونے والے دلخراش اور لرزہ خیز سانحات میں درجنوں معصوم شہریوں کی جانیں ضائع ہو گئیں، صوبے میں امن و امان کی ابتر صورتحال پر ہر آنکھ اشکبار ہے، مگر خیبر پختونخوا کے حکمرانوں کی ترجیحات تاحال تبدیل نہ ہو سکیں۔ وزیر اعلیٰ سہیل آفریدی نے ایک بار پھر یہ ثابت کر دیا کہ ان کے نزدیک عوامی جانوں کے تحفظ سے زیادہ اہم بانی پی ٹی آئی عمران خان کی صحت اور سیاست ہے۔
عوامی حلقوں کی طرف سے شدید تنقید کی جا رہی ہے کہ صوبے میں دہشت گردی اور بدامنی کے باعث خون کی ہولی کھیلی جا رہی ہے، معصوم عوام جنازے اٹھا اٹھا کر تھک چکے ہیں، لیکن صوبائی حکومت کی تمام تر توجہ اور توانائیاں صرف اور صرف ایک شخص کی صحت اور رہائی کے گرد گھومتی ہیں۔
موصوف کئی بار برملا یہ اعتراف کر چکے ہیں کہ ان کی اولین ترجیح عوامی مسائل کا حل یا صوبے کا امن نہیں بلکہ عمران خان کی صحت ہے۔ کوہاٹ کے سانحے کے بعد بھی حکومتی رویے نے یہ واضح کر دیا ہے کہ خیبر پختونخوا کے عوام اس وقت بالکل بے یار و مددگار ہیں اور صوبائی مشینری عوامی فلاح و بہبود کے بجائے سیاسی وفاداریاں نبھانے میں مصروف ہے۔
