پب جی بیٹل گراؤنڈز (PUBG Battlegrounds) کو انتہا پسندی کی ترغیب دینے، خاص طور پر کالعدم بلوچ قوم پرست اور علیحدگی پسند گروہوں جیسے کہ ‘بلوچ لبریشن آرمی’ (BLA) اور ‘بلوچ لبریشن فرنٹ’ (BLF) کے ہمدردوں کی جانب سے اپنی وابستگی، رکنیت یا وفاداری کے اظہار کی جگہ کے طور پر استعمال کیا جا رہا ہے۔ حال ہی میں یہ رپورٹ سامنے آئی ہے کہ پب جی کے بعض کھلاڑی اپنے ناموں میں براہِ راست عسکریت پسند تنظیموں کے نام شامل کر کے بی ایل اے (BLA) اور بی آر اے (BRA) کے ساتھ اپنی وابستگی ظاہر کرتے ہیں، جیسے کہ “BRAS BULBUL”، “BALOCH BLA” اور “BLA TOFAN” (اسکرین شاٹس منسلک ہیں)۔ اسی طرح جیوتی (Djibouti) کے قومی پرچم کا استعمال بھی ایک عام طریقہ کار بن چکا ہے جس کا مقصد تحریکِ آزادیِ بلوچستان کی طرف اشارہ کرنا اور بی ایل اے کی حمایت ظاہر کرنا ہے، کیونکہ یہ پرچم بعض پہلوؤں سے بلوچستان کے نام نہاد پرچم سے مشابہت رکھتا ہے۔
اہم نکات
- پاکستان میں غیر ریاستی انتہا پسند عناصر پب جی کا استعمال کر رہے ہیں۔
- مخصوص پرتشدد گروہوں کی رکنیت یا ان سے ہمدردی ظاہر کرنے کے لیے مختلف پرچموں اور فرضی ناموں (Aliases) کا سہارا لیا جا رہا ہے۔
- بی ایل اے یا بلوچستان کی آزادی کی حمایت ظاہر کرنے کے لیے جیوتی کا پرچم اور ملتے جلتے حروف والے صارف نام (Usernames) استعمال کرنا کافی عام ہے۔
حالیہ برسوں میں عالمی سطح پر گیمنگ پلیٹ فارمز کی مانگ میں نمایاں اضافہ ہوا ہے۔ جیسے جیسے گیمنگ کی صنعت 213.9 بلین ڈالر کی ایک بڑی مارکیٹ میں تبدیل ہوئی ہے، ان پلیٹ فارمز نے انتہا پسند عناصر کے ساتھ ساتھ سیکیورٹی محققین کی توجہ بھی اپنی جانب مبذول کرائی ہے۔ یورپی علاقائی اداروں جیسے کہ ‘ریڈیکلائزیشن اویرنس نیٹ ورک’ (RAN) اور ‘یورپی کاؤنٹر ٹیررازم کوآرڈینیٹر’ نے ڈیجیٹل گیمنگ کی دنیا کو انتہا پسندی کے پھیلاؤ کے لیے ایک ‘حساس مرکز’ (Hotbed) قرار دیا ہے۔ ‘ای یو ٹیررازم سچویشن اینڈ ٹرینڈ رپورٹ’ (TE-SAT) کے مطابق کووڈ-19 کی عالمی وبا کے دوران ڈیجیٹل آلات اور گیمنگ پلیٹ فارمز کے بڑھتے ہوئے استعمال نے انتہا پسند عناصر کو نوجوانوں تک رسائی حاصل کرنے اور اپنے پروپیگنڈے کو پھیلانے کا بڑا موقع فراہم کیا۔
دنیا بھر میں سب سے زیادہ کھیلی جانے والی ڈیجیٹل گیمز میں سے ایک، جسے پہلے ‘پلیئر ان نون بیٹل گراؤنڈز’ (PlayerUnknown’s Battlegrounds) کے نام سے جانا جاتا تھا، اب ‘پب جی: بیٹل گراؤنڈز’ (PUBG: Battlegrounds) کہلاتی ہے۔ جنوری 2026 تک اس گیم کے تمام نسخے (Variants) دنیا بھر میں 1.75 بلین سے زیادہ بار ڈاؤن لوڈ کیے جا چکے ہیں، اور جنوبی ایشیا اس کا سب سے بڑا مرکز ہے۔ دریں اثنا، پاکستان کا معاملہ خاص طور پر اہم ہے، جہاں پب جی موبائل نہ صرف بے پناہ مقبولیت رکھتی ہے بلکہ اس کا ایک بہت بڑا مقامی پلیئر بیس بھی موجود ہے۔
پب جی موبائل ایک ‘فری ٹو پلے’ (مفت کھیلی جانے والی) اسکواڈ پر مبنی جنگی گیم ہے۔ یہ ایک ایسے میدانِ جنگ کی شبیہ ہے جہاں کھلاڑیوں کو یہ انتخاب کرنا ہوتا ہے کہ وہ اکیلے (Solo)، دو افراد (Duo) کی صورت میں یا ایک چھوٹی ٹیم کی شکل میں کھیلنا چاہتے ہیں۔ گیم کا آغاز کھلاڑیوں کے پیراشوٹ سے چھلانگ لگانے سے ہوتا ہے۔ یہ کھلاڑیوں کو مختلف مقامات پر لے جاتی ہے، جہاں مناسب وقت پر اترنے (Ejection) کا آپشن موجود ہوتا ہے۔ گیم میں کھلاڑیوں کو اپنے لباس کو حسبِ منشا ڈھالنے (Customise) کی سہولت بھی ملتی ہے، جس کے بعد انہیں نقشے پر موجود مختلف مقامات سے اسلحہ، گاڑیاں اور دیگر سامان تلاش کرنا ہوتا ہے تاکہ وہ اپنی جنگی صلاحیت کو بہتر بنا سکیں۔ کھلاڑی ‘فرسٹ پرسن’ اور ‘تھرڈ پرسن’ پرسپیکٹو کے درمیان انتخاب کر سکتے ہیں تاکہ باقی تمام کھلاڑیوں کو ختم کر کے آخر تک زندہ رہ سکیں۔ گیم کا جنگ زدہ ماحول اور مناظر کھلاڑیوں کو سنسنی اور نفسیاتی جوش فراہم کرتے ہیں، جہاں وہ دوسرے کھلاڑیوں کو مار کر اور ان کا سامان لوٹ کر خود کو بچانے کے لیے پیچیدہ جنگی علاقوں میں اترتے ہیں۔ یہ مصنوعی ماحول (Simulacrum) ایک حقیقی میدانِ جنگ کی ہو بہ ہو نقل معلوم ہوتا ہے، لیکن حقیقت میں یہ بغیر کسی اصل کے محض ایک کاپی ہے۔
پب جی میں یہ “مصنوعی ماحول” ہر میچ کے لُوپ کو غیر متوقع بنا کر جوش و خروش برقرار رکھتا ہے، جہاں فی میچ ایک زندگی کا اصول داؤ کو مزید بڑھا دیتا ہے۔ جبکہ ملٹی پلیئر جنگی آپشنز سماجی تعلقات کو مضبوط بناتے ہیں اور گیم کو مزید سنسنی خیز اور مقابلے کو سخت بنا دیتے ہیں۔ مسلسل جوش اور غیر متوقع صورتِ حال نے اس گیم کو انتہائی تفریحی اور نشہ آور بنا دیا ہے، جس کے نتیجے میں اس نے بے پناہ مقبولیت حاصل کی ہے۔
بعض اوقات اس گیم کی غیر معمولی مقبولیت پاکستان میں ریاستی سطح کے تنازعات کا باعث بھی بنی ہے۔ 2020 میں پاکستان ٹیلی کمیونیکیشن اتھارٹی (PTA) نے اس کی نشہ آور نوعیت اور بچوں کی نفسیاتی و جسمانی صحت پر پڑنے والے منفی اثرات کی شکایات پر اس پر عارضی پابندی عائد کر دی تھی۔ تاہم، کچھ ہفتوں بعد اسلام آباد ہائی کورٹ نے یہ پابندی ختم کر دی۔ اگرچہ پاکستان میں صارفین کی مجموعی تعداد کے بارے میں کوئی سرکاری یا حتمی اعداد و شمار موجود نہیں ہیں، لیکن پب جی ٹورنامنٹس میں عوام کی بڑھتی ہوئی دلچسپی اور کارپوریٹ سیکٹر کی شمولیت اس کی شاندار کامیابی اور بے مثال مقبولیت کا ثبوت ہے۔ 2022 میں لاہور میں پب جی موبائل کی جانب سے منعقدہ قومی سطح کی چیمپئن شپ میں کل 23 ٹیموں نے حصہ لیا۔ 30,000 ڈالر کے انعامی پول کے لیے سخت ای اسپورٹس مقابلے نے یہ ثابت کیا کہ پب جی پاکستان کی یوتھ ای اسپورٹس ثقافت میں کس حد تک رچ بس چکی ہے۔
لیکن اتنی بڑی مقبولیت کے ساتھ اتنے ہی بڑے خطرات بھی جڑے ہیں، جن کا اندازہ بہت کم لوگوں کو تھا۔ جہاں لاکھوں پاکستانی اسے کھیلتے ہیں، وہیں ان میں سے کچھ لوگ اسے بالکل مختلف مقصد کے لیے استعمال کرتے دکھائی دیتے ہیں۔ حال ہی میں اس گیم میں دو ایسے طریقے نمایاں طور پر سامنے آئے ہیں جن کا براہِ راست یا بالواسطہ تعلق بلوچستان سے ہے۔ پہلا طریقہ صارف نام (Username) میں عسکریت پسند گروہوں کے نام کے حروف سے ملتے جلتے الفاظ کا استعمال ہے، جبکہ دوسرا طریقہ ان گیم بینر (In-game banner) کے طور پر جیوتی کے قومی پرچم کا انتخاب ہے۔ ان دونوں طریقوں کا استعمال غالب طور پر ان گیمز میں دیکھا گیا ہے جہاں کھلاڑی ‘بلوچ لبریشن آرمی’ (BLA) اور ‘بلوچ ریپبلکن آرمی’ (BRA) سے وابستگی یا ہمدردی کا اظہار اپنے ناموں میں ان تنظیموں کے نام شامل کر کے کرتے ہیں، جیسے کہ “BRAS BULBUL”، “BALOCH BLA”، اور “BLA TOFAN” (اسکرین شاٹس منسلک ہیں)۔ جیوتی کے قومی پرچم کا استعمال بھی ایک عام طریقہ بن چکا ہے تاکہ بلوچستان کی آزادی کی تحریک کی طرف اشارہ کیا جا سکے اور بی ایل اے کی حمایت ظاہر کی جا سکے، کیونکہ دونوں پرچم بعض پہلوؤں میں ایک جیسے ہیں۔
| جیوتی کا پرچم | خود ساختہ آزاد بلوچستان کا پرچم |
چونکہ گیمنگ پلیٹ فارمز کھلاڑیوں کو اپنے نام (Aliases)، کلین ٹیگز (Clan tags) اور اوتار (Avatars) کو اپنی مرضی کے مطابق ڈھالنے کی آزادی دیتے ہیں، اس لیے پب جی کو بھی اس طرح پروگرام کیا گیا ہے کہ کوئی بھی کھلاڑی اپنی پسند کا کوئی بھی نام یا پرچم منتخب کر سکتا ہے۔ وہ فیچر جو بنیادی طور پر کھلاڑیوں کے درمیان باہمی رابطہ بڑھانے اور کمیونٹی کی تعمیر کے لیے بنایا گیا تھا، اب عسکریت پسندوں کے حامی اور ہمدرد اس کا غلط استعمال کر رہے ہیں۔
اس گیمنگ پلیٹ فارم کو کالعدم عسکریت پسند تنظیموں کے ساتھ علانیہ وابستگی کے لیے استعمال کیا جا رہا ہے۔ یہ گیم صرف چاٹ رومز والا ایک سوشلائزنگ پلیٹ فارم نہیں ہے، بلکہ ایک ایسا جنگی ماحول (Combat Simulation) ہے جو حقیقی دنیا کے واقعات کی عکاسی کرتا ہے، پرتشدد سرگرمیوں کے ساتھ ساتھ انتہا پسند تنظیموں کو گلیمرائز کرتا ہے۔ ان تمام بڑھتے ہوئے خدشات اور شکایات کے باوجود، پب جی کی مالک سؤتھ کورین ہولڈنگ کمپنی ‘کراافٹن’ (Krafton) یا اس کا موبائل ورژن بنانے والی چینی ٹیک کمپنی ‘ٹینسنٹ’ (Tencent) کی جانب سے کوئی اقدامات نہیں کیے گئے ہیں۔
ایک کھلاڑی جس کے آئی ڈی میں BLA کا نام شامل ہے اور اس نے بلوچستان سے شناخت کے لیے جیوتی کا پرچم لگایا ہوا ہے۔
ایک اور کھلاڑی جس کے نام میں BLF شامل ہے اور وہ بھی جیوتی کا پرچم استعمال کر رہا ہے۔
ایک اور کھلاڑی جس کے نام میں BRAS کا لفظ پایا گیا ہے۔ BRAS دراصل BLA، BLF، BRG اور SRA کا ایک عسکریت پسند اتحاد ہے۔
یہ معاملہ 2024 سے پاکستان کے لیے سیکیورٹی کا ایک سنگین مسئلہ بن چکا ہے، جب سوات پولیس کو معلوم ہوا کہ کالعدم تحریکِ طالبان پاکستان (TTP) سے منسلک ایک گروہ “پب جی کو ریاست کے خلاف جنگ کے لیے اپنے ارکان کو تربیت دینے اور تحرک دینے کے لیے استعمال کرتا تھا اور مواصلات کے لیے اس کے چاٹ رومز کا سہارا لیتا تھا،” یہ بات سوات کے ڈسٹرکٹ پولیس آفیسر ڈاکٹر زاہد اللہ نے بتائی۔ گیم کے پرانے اور موجودہ رجحانات کو مدنظر رکھتے ہوئے، پاکستانی کاؤنٹر ٹیررازم حکام کو گیم ڈیوپلمنٹ اور ریگولیٹری اداروں کے سامنے یہ خدشات اٹھانے چاہئیں اور اس سلسلے میں معلومات کا تبادلہ کرنا چاہیے۔
ریاستی حکام کو ان پلیٹ فارمز پر مواد کی رسائی کو منظم کرنے کے لیے کے لیے طریقہ کار اور انتہا پسندانہ مواد کا مقابلہ کرنے کے لیے جواب دہی کے فریم ورک قائم کرنے چاہئیں۔ اگرچہ پی ٹی اے (PTA) پہلے بھی حفاظت اور سیکیورٹی کنٹرولز پر بات چیت کے لیے مختلف گیمنگ آپریٹرز کے ساتھ رابطے میں رہا ہے، لیکن روز افزوں نئی خصوصیات کے پیشِ نظر پاکستان کو ایک جامع حکمتِ عملی اختیار کرنے کی ضرورت ہے، جس میں نیکٹا (NACTA) اور پب جی کے علاقائی آپریٹر کے درمیان عسکریت پسندی سے متعلق خدشات کو حل کرنے کے لیے ایک باقاعدہ رپورٹنگ چینل کا قیام شامل ہے۔ اسی طرح، جو کھلاڑی بات چیت کے لیے تیار ہوں، ان سے متعدد سرورز پر معلومات اکٹھی کرنے کے لیے رابطہ کیا جا سکتا ہے۔ ایک سمارٹ اور منظم حکمتِ عملی کے بہترین نتائج برآمد ہو سکتے ہیں، جس سے اہم اور ہائی ویلیو ٹارگٹس کی گرفتاری یا خاتمہ ممکن ہو سکتا ہے۔
گیم کے اندر مخصوص عسکریت پسند گروہوں کے ہمدردوں کو تلاش کرنا کافی آسان ہے۔ بس ‘Add Friend’ کے آپشن پر جا کر جیوتی کا قومی پرچم منتخب کرنا ہوتا ہے۔ اس کے بعد صرف ایک سرچ سے بے شمار ایسے کھلاڑیوں کے نام سامنے آ جاتے ہیں جن میں یکسانیت ہوتی ہے (اسکرین شاٹس دیکھیں۔) یہ اکاؤنٹس یا تو گمراہ شدہ معصوم بچوں کے ہیں یا پھر کھلاڑیوں کے روپ میں عسکریت پسند تنظیموں کے فعال ارکان کے ہیں۔ یہ ایک انتہائی خطرناک رجحان ہے جو نہ صرف بلوچ عوام بلکہ پورے پاکستان کے لیے نقصان دہ ہے۔ ذیل میں گیم کے کچھ اسکرین شاٹس دیے گئے ہیں۔ اگرچہ پب جی کے کھلاڑیوں کی واقعی تعداد کے کوئی سرکاری اعداد و شمار موجود نہیں ہیں، لیکن قومی چیمپئن شپ میں کھلاڑیوں کی شرکت بچوں، نوجوان طالب علموں اور بالغوں میں اس کی بے پناہ مقبولیت کو ظاہر کرتی ہے۔ ریاستی حکام کو ان گیمنگ پلیٹ فارمز پر ہونے والی ان تمام ملک دشمن اور غیر قانونی سرگرمیوں کا تدارک کرنے کے لیے فوری اقدامات کرنے چاہئیں۔
اس اسکرین شاٹ میں ایک صارف کے نام کا حصہ BRAS ہے جبکہ دوسرے نے اپنے نام کے لیے ‘سرماچار’ کا لفظ چنا ہے۔ ‘سرماچار’ کا لفظ بلوچ عسکریت پسند استعمال کرتے ہیں جس کا مطلب مزاحمت کار یا حریت پسند ہے۔
یہ صورتِ حال صرف پاکستان تک محدود نہیں ہے؛ ماضی میں بھی داعش (ISIS) نے نئے ارکان کو تربیت دینے اور حقیقی شوٹنگ کا تجربہ فراہم کرنے کے لیے ‘فرسٹ پرسن شوٹر’ (FPS) گیمز کا سہارا لیا تھا۔ حتیٰ کہ نیوزی لینڈ میں بھی نسل پرستانہ اور شدت پسندانہ حملے ہوئے جن میں مسلمانوں کو نشانہ بنایا گیا۔ حملہ آور نے اپنے سر پر گو پرو (GoPro) کیمرہ لگا کر قتلِ عام کو اس طرح ویڈیو گیم کی شکل (Gamify) دی جیسے شوٹر ویڈیو گیمز میں ‘فرسٹ پرسن پرسپیکٹو’ ہوتا ہے، اور اسے لائیو اسٹریم بھی کیا۔ حزب اللہ کی جانب سے مشہور زمانہ ‘کال آف ڈیوٹی’ گیم کا اپنا ورژن تیار کرنے سے لے کر جرمن رائٹ ونگ گروپس کی جانب سے ‘Heimat Defender: Rebellion’ شوٹر گیم کے اجراء تک، اس نوعیت کے واقعات کی ان گنت مثالیں موجود ہیں۔
روز افزوں تکنیکی پیش رفت کے ساتھ گیمز میں نئے فیچرز شامل کیے جا رہے ہیں۔ گیمیفیکیشن (Gamification) عسکریت پسندوں کے لیے رکے بغیر ارکان کو تربیت دینے، بھرتی کرنے اور ایک دوسرے سے رابطہ قائم کرنے کا ذریعہ بنتی جا رہی ہے۔ پرتشدد کارروائیوں پر اکسانے کے لیے یکساں شدت پسندانہ نظریات رکھنے والے لوگوں کو اکٹھا کرنے کی خاطر نئی گیمز کی تیاری اور موجودہ گیمز میں ترمیم کا سلسلہ بڑھ رہا ہے۔ ہر نئے فیچر اور جدت کے ساتھ ویڈیو گیمز کی مقبولیت میں مزید اضافہ ہوگا، چاہے وہ کوئی بھی گیم ہو، اور اس سے انتہا پسند عناصر یا ان کے حامیوں کی جانب سے اس کے غلط استعمال کے امکانات بھی بڑھیں گے۔ ریاستوں کو چاہیے کہ وہ ایک ایسا ریگولیٹری فریم ورک قائم کریں جو عام اور قانونی صارفین کی پرائیویسی کا تحفظ کرے اور ساتھ ہی ان پلیٹ فارمز پر مشکوک یا غیر قانونی سرگرمیوں کی نگرانی بھی کر سکے۔
BLA کا نام استعمال کرنے والا ایک کھلاڑی جس نے گیم جیتی اور وہ فاتح ٹیم کا حصہ رہا۔
