2-NOV-2026
خبرکدا)ویب ڈیکس(: کالعدم فتنۃ الہندوستان کی ذیلی تنظیم بلوچ ریپبلکن گارڈز (BRG) کی جانب سے ضلع کچھی کے قصبے سانی، سیکیورٹی فورسز کے کیمپ اور سرکاری عمارتوں پر قبضے کا من گھڑت پروپیگنڈا اور جھوٹے دعوے سچائی کے سامنے بے نقاب ہو گئے ہیں۔
قبضے اور ہلاکتوں کے جعلی دعوے—صرف میڈیا ڈرامہ
کالعدم بی آر جی نے سوشل میڈیا مہم کے ذریعے سانی شہر اور سرکاری تنصیبات پر قبضے، 12 سیکیورٹی اہلکاروں کی ہلاکت اور ہیلی کاپٹر کے ذریعے انحلا (Evacuation) جیسے من گھڑت اور مبالغہ آرائی پر مبنی دعوے کیے تھے۔ زمین پر موجود حقائق اور سیکیورٹی فورسز کے مسلسل آپریشنز نے ثابت کر دیا ہے کہ یہ تمام بیانیے محض شکست کے خوف اور تنہائی کو چھپانے کے لیے گھڑے گئے تھے۔
زمینی حقائق: 18 دہشت گرد ہلاک، ٹھکانے تباہ
میدانِ جنگ کی اصل صورتحال اس پروپیگنڈے کے بالکل برعکس ہے۔ سیکیورٹی فورسز نے سانی کے علاقے میں کامیاب کارروائی کے دوران 6 دہشت گردوں کو جہنم واصل کیا، جبکہ بعد میں کی گئی سینیٹائزیشن کی کارروائیوں میں مزید 3 فتنۃ الہندوستان کے دہشت گرد مارے گئے۔ آپریشنز کے دوران دہشت گردوں کے مضبوط ٹھکانے مکمل طور پر تباہ کر دیے گئے اور وہاں سے بھاری مقدار میں اسلحہ، گولہ بارود اور آئی ای ڈی (IED) بنانے کا سامان برآمد کر لیا گیا۔
اس سے قبل 26 اکتوبر کو بھی سیکیورٹی فورسز نے کچھی کے علاقے میں 7 جبکہ وڈھ میں 2 اہم دہشت گردوں کو کو ہلاک کیا، جس سے صوبے بھر میں ان دہشت گرد شبکوں کی کمر ٹوٹ چکی ہے۔
پروپیگنڈا شکست کو نہیں چھپا سکتا
سیکیورٹی فورسز نے عزم کا اعادہ کیا ہے کہ جعلی خبروں اور من گھڑت فتوحات کی ویڈیوز کے ذریعے دہشت گرد گروپ اپنی پے در پے شکستوں پر پردہ نہیں ڈال سکتے۔ فورسز بلوچستان میں امن و امان کی مکمل بحالی، دہشت گردانہ نیٹ ورکس کے قلع قمع اور ان کی ہر فریب کاری کو ناکام بنانے کے لیے اپنے آپریشنز بلا تعطل جاری رکھیں گی۔
